‘కొన్నిసార్లు బుర్ర ఉపయోగించి శాంతించాలి’.. ఇజ్రాయెల్‌కు ట్రంప్ హెచ్చరిక!

పశ్చిమాసియాలో శాంతి పునరుద్ధరణ, అమెరికా-ఇరాన్ దేశాల మధ్య జరుగుతున్న కీలక దౌత్య చర్చలను కాపాడుకునేందుకు అమెరికా అధ్యక్షుడు డొనాల్డ్ ట్రంప్ నేరుగా రంగంలోకి దిగారు. లెబనాన్ సరిహద్దుల్లో సరికొత్తగా రేగిన హింస కారణంగా అంతర్జాతీయ చర్చలు ప్రమాదంలో పడటంతో.. హిజ్బుల్లాతో కాల్పుల విరమణ ఒప్పందానికి అంగీకరించాల్సిందిగా తాను ఇజ్రాయెల్ అధికారులపై వ్యక్తిగతంగా ఒత్తిడి తెచ్చినట్లు ట్రంప్ వెల్లడించారు.

శుక్రవారం ‘ఎన్‌బీసీ న్యూస్’కు ఇచ్చిన ప్రత్యేక ఫోన్ ఇంటర్వ్యూలో ఆయన మాట్లాడుతూ.. "కొన్నిసార్లు మీరు కాస్త శాంతించాలి, మీ బుర్రను ఉపయోగించాలి" అని తాను ఇజ్రాయెల్ ఉన్నతాధికారులకు హితవు పలికినట్లు పేర్కొన్నారు. అయితే ఈ విషయంలో ఇజ్రాయెల్ ప్రధాని బెంజమిన్ నెతన్యాహుతో ఆయన నేరుగా మాట్లాడిందీ.. లేనిదీ స్పష్టం చేయలేదు.

ట్రంప్ చేసిన ఈ వ్యాఖ్యల అనంతరం, అమెరికా సీనియర్ అధికారుల సమక్షంలో ఖతార్, ఇరాన్ దేశాల దౌత్య సాయంతో ఇజ్రాయెల్-హిజ్బుల్లా మధ్య కాల్పుల విరమణ ఒప్పందం కుదిరింది. లెబనాన్ స్థానిక కాలమానం ప్రకారం శుక్రవారం సాయంత్రం 4 గంటల నుంచి ఈ తాత్కాలిక సంధి అమల్లోకి వచ్చింది. ఈ ఒప్పందానికి కొన్ని గంటల ముందే దక్షిణ లెబనాన్‌పై ఇజ్రాయెల్ జరిపిన భారీ వైమానిక, ఆర్టిలరీ దాడుల్లో 47 మంది మరణించినట్లు లెబనాన్ ఆరోగ్య శాఖ తెలిపింది.

 ఈ తాజా ఒప్పందం ప్రకారం.. హిజ్బుల్లా గనుక దాడులకు దిగకపోతే ఇజ్రాయెల్ కూడా తన దూకుడును తగ్గిస్తుందని, అయితే దక్షిణ లెబనాన్ సరిహద్దుల్లోని బఫర్ జోన్ నుంచి తమ దళాలను ప్రస్తుతానికి వెనక్కి రప్పించబోమని ఇజ్రాయెల్ రక్షణ వర్గాలు స్పష్టం చేశాయి.

ఈ వారంలోనే అమెరికా-ఇరాన్ మధ్య కుదిరిన తాత్కాలిక అణు ఒప్పందం, ఆంక్షల సడలింపు చర్చలకు ఈ సరిహద్దు ఉద్రిక్తతలు పెద్ద అడ్డంకిగా మారాయి. లెబనాన్ సరిహద్దుల్లో శాంతి నెలకొంటేనే స్విట్జర్లాండ్‌లో జరగబోయే తదుపరి సాంకేతిక చర్చలకు హాజరవుతామని ఇరాన్ షరతు పెట్టడంతో వైట్ హౌస్ ఈ కాల్పుల విరమణను ప్రతిష్ఠాత్మకంగా తీసుకుంది. ఈ నేపథ్యంలోనే అమెరికా ఉపాధ్యక్షుడు జేడీ వాన్స్ తన స్విట్జర్లాండ్ పర్యటనను తాత్కాలికంగా రద్దు చేసుకున్నారు. 

ఇరాన్ ఆర్థికంగా, సైనికంగా బలహీనపడిందని, ఈ ఒప్పందం వల్ల టెహ్రాన్‌కు ఎలాంటి ఆర్థిక ప్రయోజనం చేకూరలేదని ట్రంప్ సోషల్ మీడియా వేదికగా సమర్థించుకున్నారు. ప్రస్తుతం కుదిరిన ఈ తాత్కాలిక సంధి పశ్చిమాసియాలో దీర్ఘకాలిక శాంతికి మరియు అమెరికా-ఇరాన్ దౌత్య విజయానికి పునాదిగా మారుతుందని అంతర్జాతీయ నిపుణులు విశ్లేషిస్తున్నారు.